ဧပြီ ၂၁ ရက်နေ့တွင် စစ်ကိုင်းတိုင်း၊ ပရမ်းမြို့နယ်ရှိ ၇၀၀ ပြည့် အားကစားကွင်းတွင် မလေးရှားနိုင်ငံမှ ယာယီဆေးကုသရေးစင်တာ တရားဝင် ဖွင့်လှစ်ခဲ့သည်။ အဆိုပါစင်တာသည် ပြည်သူများအား အခမဲ့ဆေးကုသမှုများ ပေးနေကြောင်း သိရသည်။
မလေးရှားစက်ရှင်ဆေးရုံ (MFH) မှ တည်ဆောက်ထားသော ဤဆေးရုံကို အမှတ်(၁) ဗိုလ်မှူးကြီး ဒေါက်တာ အာမက်ဖာဟန်အာမက်ဖွဒ် ဦးဆောင်သည့် အဖွဲ့ဝင် ၆၉ ဦးက လုပ်ဆောင်လျက်ရှိပါသည်။ ဗိုလ်မှူးကြီး ဖာဟန်က ပြောကြားရာတွင် ဒီဆေးကုသမူဟာ မကြာသေးမီက ငလျင်ဒဏ်ခံစားရသူများအား ကုသရန် ရည်ရွယ်ကြောင်း၊ ကနဦးအနေဖြင့် နှစ်ပတ်ကြာ လုပ်ဆောင်မည်ဖြစ်ပြီး လိုအပ်ပါက တစ်လအထိ တိုးမည်ဖြစ်ကြောင်း ပြောကြားခဲ့သည်။
“ကျွန်တော်တို့အဖွဲ့က ဧပြီ ၁၈ ရက်မှာ စစ်ကိုင်းကို ရောက်လာခဲ့ပါတယ်။ ပြင်ဆင်ပြီးနောက် ဧပြီ ၂၁ ရက်မှာ စတင်လုပ်ဆောင်ခဲ့ပါတယ်။ ယခင်က Smart Team တစ်ဖွဲ့က ကယ်ဆယ်ရေးလုပ်ငန်းတွေအတွက် ရောက်ရှိခဲ့ဖူးပါတယ်။ ဒီတစ်ခါတော့ ကျွန်တော်တို့အဖွဲ့က ဆေးကုသရေးကိုသာ အာရုံစိုက်ထားပါတယ်။ အားလုံးက အခမဲ့ဝန်ဆောင်မှုဖြစ်ပါတယ်” ဟု ဒေါက်တာဖာဟန်က ရှင်းပြခဲ့သည်။
ထို့အပြင် အဖွဲ့ဝင် ၆၉ ဦးတွင် အရာရှိ ၁၆ ဦးပါဝင်ပြီး ကျန်အဖွဲ့ဝင်များမှာ ကျန်းမာရေးဝန်ထမ်းများ၊ စီမံခန့်ခွဲရေးအဖွဲ့၊ လော့ဂျစ်တစ်အဖွဲ့၊ အင်ဂျင်နီယာများနှင့် ရေနှင့်လျှပ်စစ်နည်းပညာရှင်များ ပါဝင်ကြောင်း သိရသည်။
စေတနာ့ဝန်ထမ်း ဘာသာပြန်များ စုဆောင်း
ဆေးရုံတွင် ဘာသာစကားအခက်အခဲများကို ဖြေရှင်းရန် မလေးရှားအဖွဲ့သည် အင်္ဂလိပ်-မြန်မာ စေတနာ့ဝန်ထမ်း ဘာသာပြန်များ ကို စုဆောင်းလျက်ရှိသည်။ ဖွင့်လှစ်သည့်နေ့တွင် ဒေသခံလူငယ်များစွာ လာရောက်လျှောက်ထားခဲ့ပြီး နံနက်ပိုင်း အင်တာဗျူးပြီးနောက် ချက်ချင်းလုပ်ဆောင်ခဲ့ကြသည်။
“စေတနာ့ဝန်ထမ်း ဘာသာပြန်တွေလိုအပ်တယ်ဆိုတော့ လူငယ်တွေအများကြီး လာဖြည့်ခဲ့ကြတယ်။ နံနက်မှာ အင်တာဗျူးဖြေပြီး ရွေးချယ်ခံရရင် ချက်ချင်းအလုပ်စလုပ်ရတယ်။ အမျိုးသားတွေဆိုရင် လိုအပ်ရင် ညအိပ်စခန်းမှာ နေစေပြီး အမျိုးသမီးတွေကိုတော့ ညနေ ၅ နာရီမတိုင်ခင် အိမ်ပြန်ပို့ပေးတယ်” ဟု စစ်ကိုင်းမှ ဒေသခံမိဘတစ်ဦးက ပြောပြခဲ့သည်။
ဗိုလ်မှူးကြီး ဖာဟန်က မလေးရှားအစိုးရကိုယ်စား မြန်မာနိုင်ငံရှိ သက်ဆိုင်ရာအဖွဲ့အစည်းများနှင့် ဌာနများအား ကျေးဇူးတင်ကြောင်း ပြောကြားခဲ့သည်။
“ကျွန်တော်တို့ရဲ့ ပထမဦးစားပေးက ငလျင်ဒဏ်ခံရသူတွေကို ကူညီဖို့ဖြစ်ပြီး ဒုတိယအနေနဲ့ကတော့ ဆက်လက်ကုသဖို့လိုနေတဲ့ လူနာတွေကို ကူညီခြင်းဖြင့် ရှိပြီးသားဆေးရုံတွေရဲ့ ဝန်ထုပ်ဝန်ပိုးကို လျှော့ချပေးဖို့ပါ။ ကျွန်တော်တို့မှာ အထွေထွေခွဲစိတ်ဆရာဝန်တွေ၊ အရိုးအထူးကုဆရာဝန်တွေ၊ ဓာတ်မှန်စက်တွေပါ ပါဝင်ပါတယ်။ စစ်ကိုင်းအထွေထွေဆေးရုံနဲ့လည်း ညှိနှိုင်းဆောင်ရွက်နေပါတယ်” ဟု ၎င်းက ရှင်းပြခဲ့သည်။
(မူရင်းသတင်း – Daily Eleven)
